येवला नगरपरिषदेची प्लास्टिक बंदीविरोधात पुन्हा धडक कारवाई
44 किलो प्लास्टिक जप्त; ₹20,500 दंड वसूल
येवला :
राज्य शासनाच्या प्लास्टिक बंदीच्या नियमांची प्रभावी अंमलबजावणी करण्यासाठी येवला नगरपरिषदेच्या वतीने पुन्हा एकदा शहरात धडक कारवाई करण्यात आली. मुख्याधिकारी तुषार आहेर यांच्या मार्गदर्शनाखाली आठवडे बाजार परिसरासह शहरातील विविध भागांत ही मोहीम राबविण्यात आली.
या कारवाईदरम्यान बंदी असलेल्या प्लास्टिक पिशव्या व इतर प्लास्टिक साहित्याचा वापर करणाऱ्या व्यापाऱ्यांवर कारवाई करण्यात आली. नगरपरिषद पथकाने एकूण 44 किलो प्लास्टिक जप्त केले असून नियमांचे उल्लंघन करणाऱ्यांकडून ₹20,500 इतका दंड वसूल करण्यात आला.
प्लास्टिकमुळे पर्यावरणाचे मोठे नुकसान होत असून नाले, गटारी व जलवाहिन्या तुंबण्याच्या समस्या निर्माण होतात. तसेच जनावरांच्या आरोग्यावरही त्याचा विपरीत परिणाम होत असल्याने शासनाने प्लास्टिक वापरावर बंदी लागू केली आहे. या पार्श्वभूमीवर नागरिक व व्यापाऱ्यांनी पर्यावरणपूरक पर्यायांचा अवलंब करावा, असे आवाहन नगरपरिषदेच्या वतीने करण्यात आले आहे.
यावेळी स्वच्छता निरीक्षक पूनम भामरे यांनी सांगितले की, प्लास्टिक बंदी नियमांचे उल्लंघन करणाऱ्यांविरुद्ध नगरपरिषदेची कारवाई यापुढेही नियमितपणे सुरू राहणार आहे. व्यापारी व नागरिकांनी बंदी असलेल्या प्लास्टिकचा वापर टाळून नगरपरिषदेच्या कारवाईस सहकार्य करावे, असेही त्यांनी नमूद केले.
या मोहिमेत नगरपरिषदेच्या स्वच्छता विभागातील अधिकारी दीपक जावळे संदीप बोढरे लखन बाकळे वृषाली अहिरे राहुल जाधव आदींनी सहभाग घेतला. शहर स्वच्छ, सुंदर व प्रदूषणमुक्त ठेवण्यासाठी अशा प्रकारच्या कारवाया सातत्याने राबविण्यात येणार असल्याचे प्रशासनाने स्पष्ट केले आहे.