राष्ट्रवादीचे नेते माणिकराव शिंदे यांची प्रशासकीय अधिकाऱ्यांच्या अनधिकृत बैठकांवरून आक्रमक भूमिका
येवला : येवला तालुक्यातील महसूल, सार्वजनिक बांधकाम नगरपालिका, आरोग्य विभाग, पंचायत समिती सह विद्युत विभागाचे प्रशासकीय अधिकारी कोणत्याही संविधानिक पदावर नसलेल्या एका अनधिकृत व्यक्तीच्या बेकायदेशीर आढावा बैठकांना उपस्थित राहत असल्याचा आरोप करत, राष्ट्रवादी काँग्रेसचे नेते माणिकराव शिंदे यांनी आक्रमक पत्रकार परिषद घेतली.
शिंदे यांनी या अधिकाऱ्यांचे हे गैरवर्तन आणि प्रशासकीय चूक असल्याचे म्हटले. बोलवणारा कोणीही असो, अधिकाऱ्यांवर प्रशासकीय कारवाई अपेक्षित असल्याचे त्यांनी नमूद केले. त्यांनी सर्व अधिकाऱ्यांना इशारा दिला आहे की, यापुढे जर अशा अनधिकृत बैठकांना (जिथे नामदार स्वतः उपस्थित नाहीत) उपस्थित राहिल्यास त्यांच्यावर निलंबनासारखी प्रशासकीय कारवाई का करू नये, याबाबत वरिष्ठांकडे विचारणा व योग्य ते पुढचे पाऊल उचलले जाईल.
शिंदे यांनी स्पष्ट केले की, यापुढे जर कोणत्याही व्यक्तीला अधिकार नसताना, त्याच्या बैठकीला शासकीय अधिकारी (प्रशासकीय सहायक, इंजिनियर्स इत्यादी) उपस्थित राहिल्यास, त्या अधिकाऱ्यांच्या विरोधात निश्चितपणे तक्रार करून त्यांच्या निलंबनाची मागणी केली जाईल.
अतिवृष्टीने झालेल्या नुकसानीची दखल घेण्याची मागणी
या पत्रकार परिषदेत माणिकराव शिंदे यांनी तालुक्याच्या पूर्व भागात झालेल्या अतिवृष्टीमुळे झालेल्या नुकसानीचा मुद्दाही उपस्थित केला. त्यांनी शासनाला विनंती केली की, येवला तालुक्याच्या पूर्व भागातील किंवा ज्या ठिकाणी जास्त पाऊस पडलेला आहे आणि नुकसान झाले आहे, त्या ठिकाणी तातडीने पंचनामे करून मदतीचा निर्णय घ्यावा.